BLOODBANK.GE გაიღე სისხლი, გადაარჩინე სიცოცხლე!

ჩვენო ძვირფასო თანამემამულენო მინდა მოგესალმოთ და გაუწყოთ, რომ ყოველ წუთს ვინმეს სიცოცხლის გადასარჩენად საჭიროა სისხლი. სისხლის მიღების ერთადერთი წყარო ადამიანია – სისხლის დონორი. ჯანდაცვის მსოფლიო ორგანიზაციის მონაცემებით საქართველოში სისხლის დონორთა რაოდენობა საჭიროზე ნაკლებია. პაციენტთა დასახმარებლად ყოველწლიურად საშუალოდ 60 000 დონორისგან მიღებული სისხლია საჭირო. საქართველოში კი ეს რიცხვი 37 000 -ს არ აღემატება. ამათგან უმეტესობა სისხლის ჩაბარებაში ფულად ანაზღაურებას იღებს.

სისხლის სამკურნალოდ გამოყენება შეუცვლელია ისეთი დაავადებების დროს , როგორიცაა ლეიკემია განსაკუთრებით ბავშვებში, სხვადასხვა მიზეზით გამოწვეული სისხლდენები , ქირურგიული , გინეკოლოგიური, ტრავმული და სხვა დაავადებები. ყოველ მესამე ადამიანს წელიწადში ერთხელ მაინც ესაჭიროება სისხლის გადასხმა.

იმისათვის , რომ უმძიმეს მდგომარეობაში მყოფ ავადმყოფებს მათი სიცოცხლის გადასარჩენად დროულად მიეწოდოს საჭირო ოდენობისა და შესაბამისი ჯგუფის სისხლი, აუცილებელია შეიქმნას სისხლის მარაგი – ბანკი. სწორედაც შ.პ.ს „ჰემა-2012“-ის სისხლის ბანკი ახორციელებს დონორული სისხლისგან სისხლის კომპონენტების დამზადებას, მათ შენახვასა და უწყვეტად მიწოდებას , როგორც აჭარის და გურიის რეგიონში , ასევე ქ. ფოთში განთავსებულ სამედიცინო დაწესებულებებისთვის. აქ მიმდინარე სპეციფიური სამედიცინო საქმიანობის, გამოცდილი, კვალიფიციური და პროფესიონალი სამედიცინო კადრებისა და მათი 24 საათიანი დაუღალავი შრომის შედეგია ის , რომ თითქმის 100% – ით მარაგდება ყველა სამედიცინო დაწესებულება მათთან სამკურნალოდ მყოფ ავადმყოფთა საჭიროებისათვის აუცილებელი სისხლის კომპონენტებით, რითაც სისხლის დონორებთან ერთად უდიდესი წვლილი შეგვაქვს უმძიმეს მდგომარეობაში მყოფ ავადმყოფთა სიცოცხლის გადარჩენაში.

ჩვენთან ყოველწლიურად მზადდება 3000 – მდე დონორული სისხლი, რომელსაც მოიხმარს 6000 -მდე ავადმყოფი. შ.პ.ს „ჰემა-2012“–ის სისხლის ბანკი მონაწილეობს უსაფრთხო სისხლის სახელმწიფო პროგრამაში – რაც გულისხმობს დონორის სისხლის კვლევას HBsAg (B) და HCV (C ) ჰეპატიტზე, შიდსზე და ათაშანგზე.

მივაღწიეთ იმას, რომ ჩვენთან დამზადებული სისხლის 50 % უანგარო დონორებისგანაა მიღებული. მაგრამ ჯერ კიდევ დიდია ნათესავი დონორისაგან მიღებული სისხლის წილი . დაწესებულებას უარი აქვს ნათქვამი ფასიან დონორის მოზიდვაზე.

2014 წლის იანვრიდან შ.პ.ს „ჰემა-2012’ განთავსდა ახალ შენობაში, სამსახური აღიჭურვა ახალი თანამედროვე სამედიცინო აპარატურითა და ინვენტარით. იგი როგორც სამედიცინო კადრებით მათი პროფესიონალიზმითა და კვალიფიკაციით, ასევე სამედიცინო აღჭურვილობით აკმაყოფილებს სისხლის სამსახურისადმი წაყენებულ თანამედროვე მოთხოვნებსა და სტანდარტებს.